er það nú vitleysa

Þetta er nú meiri vitleysan og ég held að það þjóni engum tilgangi að spyrja svona mis gáfaðra spurninga þegar fólk fer að stofna til viðksipta í bankanum. Hvað myndi bankastarfsmaðurinn gera ef viðkomandi myndi svara spurningunni  um hryðjuverkasamtökin játandi :) myndi hann merkja við JÁ og svo halda áfram með spurningalistann........Ég held að spurningaflóð sem þetta þjóni engum tilgangi það frekar fæli fólk frá...

„Ertu hryðjuverkamaður?“

Flott hjá Stöð2 - til hamingju Jógvan

Það var góð ákvörðun hjá Stöð2 að hafa úrslitaþátt X-factor á þessu ágæta föstudags langakvöldi, ég er einn af þeim sem hef svo sem ekki fylgst mjög mikið með þessum þáttum í vetur en ég horfði á allan þáttinn í kvöld og skemmti mér mjög vel. Það hefur alltaf einhvern veginn verið þannig að þetta er eitt af fáum kvöldum á árinu þar sem lítið sem ekkert áhugavert er í sjónvarpinu en það var sjónvarpskvöld í kvöld og það er Stöð2 að þakka.

Ég óska Jógvan til hamingju með sigurinn hann var mjög góður í kvöld og átti sigurinn fyllilega skilið, stelpurnar úr körfuboltabænum Hveragerði  stóðu sig svo sem vel líka en Jógvan mun betri.

Fjölskyldudagurinn langi

Dagurinn í dag hefur verið hreint út sagt frábær og litla fjölskyldan úr Grarfarvoginum hefur  nýtt daginn vel í það vera saman.  Það er nauðsynlegt að fá einn og einn dag eins og föstudaginn langa þar sem næstum allt er lokað og fjölskyldan nýtur þess að vera saman og gerir ekkert annað – því miður er of algengt að maður freistist til að kíkja í Smáralindina, Kringluna , á Laugaveginn og svo mætti lengi telja. En eins og í dag þá bara var það ekki hægt – föstudagurinn langi er því í raun fjölskyldudagurinn langi  

Það hefur verið mjög mikið að gera hjá mér í allan vetur  og  það er hægt að telja á fingrum annarar handar þá heilu frídaga sem við höfum náð saman frá jólum. Þetta var því kærkomin dagur fyrir okkur og í raun nauðsynlegt er fá svona frábæran frídag.

Ég er því mjög glaður og sáttur við föstudaginn  langa  eins og hann er  í okkar þjóðfélagi og hlakka til að halda áfram í fyrramálið að nýta tíman eins og hægt er með fjölskyldunni t.d. er ég búinn að lofa því að fara með guttanum út í körfubolta.

skemmtileg lesning

Í kvöld fara fram oddaleikirnir i undanúrslitum Iceland Express deildar karla og verður mikið fjör á báðum leikstöðum. Eins og ég hef sagt áður hér þá eru mörg félög sem leggja mikinn metnað í fréttaflutning á  heimasíðum sínum í körfunni. Núna er spennan farin að magnast upp fyrir kvöldið og gaman hefur verið að fylgjast með heimasíðum félaganna í gær og í dag, hérna er linkur inná þessar síður félaganna sem berjast munu í kvöld um að leika til úrslita um Íslandsmeistaratitilinn í Iceland Express deild karla þetta vorið. 

frekar skrítið

Ég skil vel að stjórnmálafokkarnir séu að berjast við að fjármagna kosningabaráttu sína um þessar mundir og reyni með öllum ráðum að safna peningum.  

Mér finnst samt frekar skrítið að VG biðji Alcan um að fjármagna hlut í kosningabaráttu sinni  og mjög "ótaktískt" hjá Vinstri grænum að gera þetta. VG hefur barist mjög hart gegn álversframkvæmdum og mjög margir aðilar innan VG börðust mjög hart gegn stækkun álvers í Hafnarfirði þar sem Alacan tapaði miklu fjármagni á því hvernig þær kosningar fóru. Svo koma fulltrúar VG og biðja Alcan um pening....mér finnst það frekar skrítið og í raun þá er ég hissa á Vinstri grænum að gera þetta. 

VG óskuðu eftir fjárstuðningi Alcan

fróðlegt

Það er alltaf gaman að velta þessum blessuðu skoðanakönnunum fyrir sér og sérstaklega þegar aðeins rétt mánuður er til alþingiskosninga og fjörið að fara að ná hámarki.

Það er ánægjulegt að sjá Sjálfstæðisflokkinn eins sterkan og hann er nú og greinilegt að stór hluti landsmanna vill sjá þennan öfluga flokk áfram við landsstjórnina. VG enn  stærri en Samfylkingin og það sem meira er að þessir "stóru" vinstri flokkar eru saman jafnstórir og Sjálfstæðisflokkurinn og það hlýtur að vera áhygjuefni fyrir vinstri menn þegar svo stutt er til kosninga. Að vísu held ég að Samfylkingin eigi eftir að sækja dálítið á og muni að lokum verða talsvert stærri en VG. Fylgi Framsóknar kemur ekkert á óvart og ekkert nýtt þar á ferð. Ég veit satt best að segja ekki alveg hvað verður um Frjálslynda  en ætli þeir muni ekki ná 3-4 þingmönnum á lokasprettinum en Íslandshreyfingin er að mínu mati ekki nógu sterkt til að koma manni að á þing.

En þetta eru nú allt bara óvísndalegar pælingar á skírdagsmorgni hjá mér og fróðlegt verður að fylgjast með kosningabaráttunni áfram. Ég hef ávallt stutt Sjálfstæðisflokkinn  en ég mun ekki gera upp hug minn fyrr en ég sé afstöðu allra stjórnmálaflokkana til íþróttamálana og bíð spenntur eftir þeim svörum.

Sjálfstæðisflokkur með rúm 40% og VG með 21%

flott á Ásvöllum í gær

Mig langar að hrósa stjórn körfuknattleiksdeildar Hauka fyrir flotta athöfn í hálfleik á leik Hauka og Keflvíkur í úrslitum Iceland Expressdeild kvenna. Ljósin voru slökkt í íþróttahúsinu og nýkrýndir Íslandsmeistarar Hauka í MB10ára drengja voru kallaðir fram og fékk hver leikmaður páskaegg frá Góu að gjöf frá deildinni. Stundum gleymist það  að gera vel fyrir yngri iðkendurnar,  þetta var mjög skemmtilega framsett hja Haukafólki í gærkvöldi. Hérna er hægt að sjá mynd af Íslandsmeisturum Hauka í MB10 ára drengja

Leikirnir beint á netinu

Eins og ég hef skrifað hér áður þá er ég mjög stoltur af því hversu vel körfuknattleikshreyfingin hefur nýtt sér tækni internetsins. Eitt af því sem einstaklingar innan körfuboltans hafa verð brautryðjendur í eru beinar útsendingar á netinu. Núna í kvöld fara fram leikir nr.4 í undanúrslitum IcelandExpress deildar karla, eins og allir vita þá sýnir íþróttarásin SÝN beint frá Grindavík í kvöld og er einnig með myndavél í Stykkishólmi og munu sýna þaðan einnig. Svo verður hægt að fylgjast með báðum leikjunum með beinni textalýsingu. Snæfell-KR er beint á KR-síðunni  og Grindavík-Njarðvík er beint á karfan.is. Þeir sem ekki komast ekki á leikina þurfa því ekki missa af neinu - horfa á leikina á SÝN eða kíkja á netið og fylgjast með   

Gaman á Skaganum í gær

Um nýliðna helgi var af nógu að taka í körfunni og m.a. var úrslitakeppni 2.d.karla haldin á Akranesi. Ég fór á Skagan í gær til þess að afhenda þeim sem unnu sín verðlaun, ég sá leikina um 3ja  sætið og svo úrslitaleikinn. Það var mjög gaman að sjá baráttuna í liðunum og  greinlegt var að það var mikill metnaður hjá mörgum liðum að komast upp í 1.d.ka að ári.  Úrslitaleikurinn var á milli Þróttar Voga og Reynis Sandgerði, þessi bæði lið munu spila í 1.d.ka á næsta tímabili. Leikurinn  var mjög skemmtilegur á að horfa og var hann tvíframlengdur en það voru Þróttarar sem stóðu uppi sem sigurvegar að lokum. Skagamenn sem enduðu í 3ja. sæti á mótinu eiga hrós skilið fyrir framkvæmdina á mótinu en það þarf margar hendur til að allt gangi upp við mót sem þetta og að sjálfsögðu allt í sjálfboðavinnu.

íbúalýðræði...

Undanfarna daga hefur verið mikið rætt og ritað um svokallað íbúalýðræði. Fulltrúar Samfylkingarinnar og Vinstri Grænna hafa lofsamað þetta fyrirkomulag að íbúarnir fái að kjósa um "mikilvæg" mál eins og þeir kalla það. Ég sagði um helgina mína skoðun á þessu máli, við kjósum einstaklinga á þing og í sveitastjórnir til þess að taka ákvarðanir sem þessar. Ég er ekkert endilega alltaf sammála þeim ákvörðunum sem teknar eru á alþingi eða í sveitarstjórnum en þar eru okkar kjörnu fulltrúar búnir að kynna sér málin frá A-Ö og taka ákvörðun útfrá því. Ég stórefa að meira en 10% þeirra sem kusu í kosningunum um helgina hafi kynnst sér málið það vel að þeir hafi getað myndað sér alvöru skoðun á málinu. Að mörgu leyti er það ábyrgðarleysi þegar hinir kjörnu fulltrúar þora ekki að taka ákvörðun  og láta Pétur og Pál bara kjósa um "mikilvæg" mál  Ef Samfylkingin og/eða VG komast í ríkisstjórn munu þeir þá alltaf fría sig ábyrgð þegar kemur að "mikilvægum" málum og biðja mig og aðra íbúa þessa lands að kjósa um málið??